某日，小心格格一大朝早，就唻到御花園鬼殺咁嘈：「皇兄，皇兄！快啲醒啦，我踢咗你一嘢呀！」能夠踢人踢到街知巷聞，除咗朕嗰兩個『索索地』嘅皇妹，都唔可能再有第三個，所以呢個一定係如假包換嘅小心格格。於是朕不虞有他，準備用腳趾公唻一個神犬－－『拉茜』，點知一睇真啲，嘩！好索！就係呢一下分神，畀個踢省中朕條龍鬚。
　　見到呢個踢，令朕想起千般往事......
　　正當【天地玄黃，宇宙洪荒，日月盈昃，晨宿列張】嘅盤古之時，世界出現咗第一種生物，佢姓『單』，叫『細胞』，冇腦嘅，得一粒核，唔係喉核，係細胞核。然後唔知點解，又出現咗『女媧』同埋『將臣』喎，佢哋重無無聊聊，整咗啲翼龍呀，速龍呀噉，終於畀佢哋攪咗地球上第一個公園﹣﹣『豬籮紀香公園』，聽聞後尾『屎匹布』都係問佢哋租咗嗰度唻拍『做囉骰拍』咋。

　　不過電影係反映現實（又或者你可以話，電視／電影係製造現實，唔係邊有咁多為爭廁所就殺人嘅新聞發生呀？），『豬籮紀香』經營不善係真嘅，『小便利』同『大便當』嘅記者報料，話裡面變到冇王管，好似停瘋拍豬大昏，狗仔偷拍阿嬌喚三，重有單堅料，原來裡面啲恐龍關係好複雜，一時『暴龍』喪啜『速龍』，一時又『飛龍』猴擒『劍齒龍』、『猛龍』過江決戰李小龍，之後又話『城龍』過關排長龍，總之好亂，最後出事喇，傳聞唔知阿邊個同邊個，响日本偷偷生咗個細路，咪話日本啲嘢唔騎呢，呢個細路好有觀眾緣，响日本紅到香港，後尾嫁咗比阿大哥，於是人人都尊稱佢做『哥師奶』嘞。

　　係咪覺得好亂呀？歷史呢家嘢，係噉架喇，聽埋落去啦。
　　就响六七百萬年前，人類嘅先祖出現，跟據屎書記載，佢有個好大嘅嘴巴，著住一件白色過頭笠，不過佢呢件衫手工麻麻，走線，你哋睇，佢頭頂嗰三條走得最犀利，呢！就係佢嘞。

　　從『大耳民』嘅『進化卵』記錄低，原來當一個生命結束，就代表佢己經死咗；而當一個生命嘅誕生，就代表佢屋企多咗個細路。真係字字珠璣！當三支叉唔响度之後，你睇大雄屋企，多咗個細路喇。

　　直到人類呢個族群越唻越大，各式各樣事物推陳出新，喺人人都沉醉响紙醉金迷嘅時候，世界上出現咗一個專門打救呢班沉淪百姓嘅神，佢就係－－『賭～～～神』！賭神有咩咁厲害？嘿嘿嘿，咪話朕唔早響，做好心理準備。話說佢份人脾氣古怪，唔鍾意影相，但係佢賭親都要係大場面，重落親車都向住各大小傳媒揮手，班記者就係噉影，但係到最後，竟然只係影到佢背脊，真係要大聲嗌：「神呀！」當然，會有啲初出茅廬嘅小記會嗌咗：「鬼呀！」各人喜好啦。

　　終於去到廿年前，亦即是三歲登基嘅朕啱啱出世嘅十六年前，當時楊過見到小龍女留畀佢嘅字條，話十六年之後見噉話。

就响佢睇埋最後嗰粒字嘅時候，忽然電光一閃，大家都話嗰啲係『晴天霹靂』，查實，又係無良狗仔偷拍。

果然，佢哋嘅魔爪已經由藝人名人，伸展到去一對小情人處喇.........咦？！未住，嗰啲咩唻架？......

　　根據靈學專家講，嗰啲係『靈體』！！！果然係專家，講句嘢都零舎『豬』...呀，對唔住，應該係『專』過人。但係專家都係人，總有分析錯誤嘅時候，雖然，佢哋嘅錯誤比常人多，而且好多時都近乎『廢話』，但係佢哋依然值得大家景仰。因為經過有另一位攝影『專家』指出，嗰個係『寫真』，冇錯，寫真唔一定『三點畢露』，佢哋都可以係『三點不露』，我國古代到處都係『寫真』架！
　　睇真啲，噫咦，呢幅『寫真』真係寫得好逼真下喎。情景相融，栩栩如生，响一片黑白裡面，展現出斑斕嘅色彩，令人望而生敬，敬而生仰，真係將畫中人嗰份英氣散發得淋漓盡致，國寶！國寶呀！！

　　講咗咁大段歷史，所謂何事呢？原來，朕只係想令大家喺讀『時間簡史』之餘，都得閒讀下朕呢個更令人『震忿』嘅『時間楝屎』啫。